OECD: Austria dhe Gjermania rrezikojnë tkurrje drastike të fuqisë punëtore deri në vitin 2060
Popullsia në moshë pune në Austrinë dhe Gjermaninë pritet të pësojë një rënie drastike deri në vitin 2060, paralajmëron Organizata për Bashkëpunim Ekonomik dhe Zhvillim (OECD). Sipas parashikimeve më të fundit, Austria do të humbasë rreth 24 përqind të popullsisë aktive, ndërsa Gjermania 23 përqind, shumë mbi mesataren e vendeve anëtare të OECD-së, e cila qëndron në vetëm 8 përqind.
“Plakja e popullsisë do të çojë në mungesa të theksuara të fuqisë punëtore dhe do të vërë presion të madh mbi financat publike,” tha Sekretari i Përgjithshëm i OECD-së, Mathias Cormann, të mërkurën, duke theksuar se Austria është ndër vendet më të goditura nga ky trend demografik.
Pavarësisht këtyre sfidave të pritshme, tregjet e punës në vendet e OECD-së aktualisht janë të fuqishme. Në vitin 2023, shkalla mesatare e punësimit arriti në 72.1 përqind – niveli më i lartë që nga viti 2005. Sipas OECD-së, ky është një sinjal pozitiv që duhet shfrytëzuar për të përgatitur ekonomitë ndaj ndryshimeve afatgjata.
Në raportin e saj të fundit, OECD nënvizon se pjesëmarrja në fuqinë punëtore mund të ruhet duke krijuar më shumë mundësi për punësimin e të moshuarve dhe duke rritur angazhimin e grave në tregun e punës. Po ashtu, përmirësimi i produktivitetit do të jetë thelbësor për të kompensuar ngadalësimin e mundshëm të rritjes ekonomike për frymë.
Për Austrinë dhe Gjermaninë, organizata rekomandon një qasje më aktive në mobilizimin e potencialit të papërdorur të fuqisë punëtore. Kjo përfshin qëndrimin më të gjatë në punë të punëtorëve të moshuar, rritjen e migrimit të rregullt dhe uljen e pabarazive gjinore në punësim. Sipas OECD-së, këto masa mund të amortizojnë ndikimet negative që do të sjellin ndryshimet demografike në dekadat e ardhshme.
